Santiago acollerá o vindeiro 31 de maio un dos concertos conmemorativos do 60º aniversario do Orfeón Terra a Nosa (1966-2026), unha celebración que conta co apoio do Concello compostelán e que inclúe unha programación musical en distintos puntos de Galicia.
A concelleira de Capital Cultural, Míriam Louzao, participou este martes na presentación desta efeméride, xunto ao director do orfeón, Luis Martínez, o secretario xeral de Cultura, Anxo Lorenzo, e un representante do Concello de Monforte. O repertorio previsto para esta celebración inclúe obras do século XIX de compositores como Saverio Mercadante, Niccolò Zingarelli, Juan Crisóstomo de Arriaga, Giacomo Puccini e Gaetano Donizetti.
Durante a súa intervención, Louzao felicitou á formación polo seu 60º aniversario e puxo en valor o papel da colaboración institucional para facer posibles proxectos culturais desta natureza. Segundo destacou, deste tipo de cooperación “sempre nacen os mellores proxectos”.
A concelleira subliñou tamén a relevancia do Orfeón Terra a Nosa na vida cultural da cidade, sinalando que “o orfeón é un dos protagonistas indiscutibles da vida cultural compostelá, uns deses protagonistas que co seu traballo, ano a ano, axudou a conformar a Compostela Capital Cultural da que nos sentimos tan orgullosas e da que nos gabamos cada día”.
